Patay ang usa ka Lolo human nga gidunggab sa iyahang kaugalingong apo samtang anaa kini sulod sa ilahang panimalay.
Subay sa report gikan sa San Pedro Police Station, giila ang biktima nga si Jose Lorejo Forteza, 74-anyos, samtang ang suspek ang giila nga si Jomar Fortaleza Cuela, 27-anyos nga susamang residente sa Purok 11, Sitio Camella, Brgy. 9-A, San Rafael, ning dakbayan sa Davao.
Subay sa gihimong imbistigasyon sa kapulisan, nahitabo ang pagpanunggab pasado alas Singko kagahapon sa buntag, diin sumala pa sa laing apo sa biktima nga si Christine Cuela, 21-anyos, usa ka call center agent, nga iyang nadungog matud pa ang kusog nga singgit sa iyang lolo nga nangayog tabang gikan sa kuwarto nga anaa sa silong nga bahin.
Ug sa pagsusi sa nahisgutan, nagkadugo na ang iyahang apohan tungod sa samad dinunggaban.
Gidala gilayon ang biktima sa Southern Philippines Medical Center (SPMC) apan gideklara kining patay na pipila ka minutos ang nakalabay.
Sumala pa sa inisyal nga imbistigasyon sa kapulisan nga ang suspetsado adunay gihambin nga mental illness kon problema sa iyahang panghuna-huna nga kana ang sutaon usab kaon sa mga doktor.
