DAVAO CITY – Nakiglambigit na matud pa karon ang lokal nga kagamhanan ngadto sa Southern Philippines Medical Center (SPMC) aron nga mapadali ang cremation sa mga patay’ng lawas sa mga indibidwal nga namatay gumikan sa Covid-19.
Una ng gibutyag ni Davao City Mayor Inday Sara Duterte-Carpio nga nakighinabi na siya sa SPMC kini aron nga dili mag-tapok ang mga patay’ng lawas.
Gikanayong sukad sa Abril sa milabay nga tuig, anaa na sa 944 ka mga patay’ng lawas ang gipailalom sa cremation samtang karong semanaha, anaa sa 12 pa ang kinahanglan nga sunugon.
Gikanayong ang pag-cremate sa patay’ng lawas nagdepende sa rekomendasyon sa mga doktor ilabi na kung namatay kini sa COVID-19 o gikatahapan lamang kini nga namatay tungod sa maong disease.
Isip kabahin sa Covid-19 response sa siyudad, ang Davao City crematorium ug Wireless Cemetery ang namugna ug nagsugod sa pag-operate kaniadtong Pebrero ning tuig kasamtangan.
Gidisenyo kini aron nga maka-cater ug mga Covid-19 related deaths ug masolusyonan ang padayon nga pagsaka sa referrals alang sa cremation sa mga pasyente nga namatay sa disease.
Sa kasamtangan, nakiglambigit na sab ang lokal nga kagamhanan sa private crematoriums sa higayon nga moabot magkadaghan ang ihap sa mga mamatay tungod sa covid-19.
