DAVAO CITY – Nagahulat na lang sa gikinahanglang logistics ang Davao City Government aron masugdan ang pagbakuna og booster doses alang sa senior citizens ug adults with comorbidities.
Matud sa tigpamaba sa COVID-19 Task Force sa siyudad nga si Dr. Michelle Schlosser, mga healthcare worker pa lang sa karon ang ginabakunahan og booster shots sa mga vaccination site sa Almendras Gym ug USEP Gym, diin abli usab kini sa mga walk-in.
Nagapadayon usab ang pagbakuna sa mga hospital personnel sa Southern Philippines Medical Center ug sa mga pribadong ospital sa siyudad, lakip na usab ang mga staff sa Temporary Treatment and Monitoring Facilities kon TTFM ug ang Rapid Action Team.
Samtang, sa Disyembre 2, 3 ug 6 pa magpahigayon ang mga anaa sa secondary ug primary hospitals ug infirmary og booster vaccination.
Sa higayong magsugdan na ang pagbakuna og booster doses sa senior citizens ug adults with comorbidities, musunod na niini ang essential workers, poor population, ug general population.
Nagpagawas na sab og sumbanan ang Department of Health kalabot sa homologous ug heterologous boosters alang sa mga fully-vaccinated.
