DAVAO CITY – Mopahigayon ug mobile passport application service dinhi sa dakbayan sa Davao karung Marso 16-17 alang sa mga dili makapa-book sa online.
Kaabag sa Department of Foreign Affairs (DFA) ang Davao City government sa pagpahigayon ug “Passport on Wheels” (POW) program.
Sumala kang Konsehal Al Ryan Alejandre, sa mga interesado nga mopahimulos sa serbisyo sa passport on wheels , kinahanglan lamang nga mosumite ug mga gikinahanglanb nga dokumento sa City Administrator’s Office hangtud sa Marso 7.
Gitino sa opisyal nga dili na sila modawat ug walk-in applicants sa Marso 16 ug 17. Pipila sa mga rekisitos nga gikinahanglan sa pagkuha ug bag-ong pass port mao ang duly accomplished form, original copy sa authenticated birth certificate nga gi-isyu sa Philippine Statistics Authority; kung minyo, kinahanglan ang kopya sa marriage contract, ug original ingon man photocopy sa valid identification document (ID).
Sa mga buot mag renew sa ePassports, kinahanglan nga adunay confirmed online application, accomplished application form, current ePassport nga adunay photocopy sa data package ug original PAS documents.
Samtang sa mga naghupot ug machine readable passports o kadtong kolor maroon o green passports ingon man kadtong mga karaan nga pasaporte, ipailalom kini isip new application.
Gikanayong ang passport fee anaa sa P1,200 ug courier fee nga P150. Samtang kadtong mga nangawala o expired passports, dugang bayrunon nga P350 ang bayaran.
Subay sa data sa DFA, kinatibuk-ang 25,645 passport applicants ang naserbisyohan sukad nga gilunsad ang POW kaniadtong milabay nga bulan sa Enero ning tuig kasamtangan.
