DAVAO CITY – Nanawagan si Davao City Mayor Inday Sara Duterte Carpio sa publiko nga wala pa nag-isyu ang lokal nga kagamhanan ug bisan unsa man nga link diin mamahimo sila nga maka-rehistro sa QR code system.
Una ng gibutyag sa Mayor nga ang QR code system nga giila sab sa tawag nga SafeDavao QR ang makatabang sa Covid-19 contact tracing effort sa dakbayan apan gikatakda pa kini nga ipailalom sa pilot testing ug kasamtangan pa nga exclusive sa City Government employees.
Gitino sa Mayor nga ang nahisgutan nga system ang dili pa available sa general public gumikan kay wala pa kini nakompleto.
Kahinumduman nga nanggawas karon ang image samples sa SafeDavao QR ingon man links sa sa mga social media diin mamahimo sumala pa nga makarehistro.
Gitambagan ni Mayor Inday ang mga dabawenyo nga dili pisliton ang links gumikan sa posibilidad nga usa kini ka fraudulent attempts aron lamang makakuha ug sensitive information o data, sama sa usernames, passwords ug credit card details.
Una na sab nga gibutyag ni Davao City Anti-Scam Unit Head Simplicio Sagarino nga gimonitor na nila karon ang pipila ka mga indibidwal nga nagpahimulos sa QR code implementation siyudad pinaagi sa phishing activities.
Nagbahad sab kini nga mamahimong mag-atubang ug kaso ang mga madakpan ug mapahamtangan ug penalty nga duruha ka tuig nga pagkabilanggo ug pamultahon ug dili moubos o mosobra sa P5,000.
