DAVAO CITY – Mupatuman og laing hinabang ang City Government of Davao ug Department of Labor and Employement (DOLE) XI alang sa mga indibidwal nga hilabihan nga naapektuhan sa Covid-19 pandemic ubos sa programa nga Tulong pangkabuyahan sa ating disadvantage displace worker o TUPAD program sa dakbayan sa Davao.
Sumala sa pamahayag ni Mayor Inday Sara Duterte Carpio, nga mitagana ang lokal nga kagamhanan ug DOLE XI og dungag nga 15 milyon nga kantidad nga hinabang sa mga katawhan.
Kahinumdoman nga mihatag na og 6,000 pesos ang kagamhanan ug ahensya ngadto sa mga benepisyaryo sa nahisgutang programa. Dugang sa mayor nga dili na makakuha og hinabang katong mga indibidwal nga nahatagan na niini.
Gani, gipunting sa kagamhanan nga anaa 2,335 ka katawhan ang maka benepisyo gikan sa mga nagkadaiyang barangay sa syudad.
Gibutyag sa Mayor nga ang matabangan lang niini kadtong mga indibidwal nga wala gihapoy trabaho ug padayon nga nag atubang sa kalisod gumikan sa Covid-19 pandemic.
Apan, ang mamahimo nga benepisyaryo, kinahanglan nga mutrabaho sa 15 diyas gikan alas 8 sa buntag hangtod alas 5 sa hapon kung diin mukabat sa 6,000 pesos ang gitagana nga sweldo niini.
Kasamtangan, nagpaabot pa ang kagamhanan sa mga listahan sa mga bag-ong benepisyaryo sa dungag nga hinabang sa TUPAD program sa dakbayan.
