DAVAO CITY – Gikalipay sa lokal nga kagamhanan ang nahimong hukom batok sa mga indibidwal nga responsable sa ngilngig Roxas night market bombing kaniadtong Sstyembre 2, 2016 nga miresulta sa kamatayon sa 17 ka mga indibidwal.
Sumala pa kang Acting City Mayor Sebastian Duterte nga ang hukom ni Judge Marivic Vitor sa Regional Trial Court Branch 266 sa Taguig ang nagpamatuod nga nahatud na ang hustisya sa mga namataya sa pagpamomba, survivors, mga minahal sa kinabuhi sa mga biktima ug sa tibuok siyudad sa Davao nga apektado sa impact sa terror attack.
Gikanayon sa Bise Mayor nga sa milabay nga mga katuigan, nagpadayon ang kasubo sa dakbayan alang sa mga pamilya sa biktima ilabi na sa ngilngig nga pagbusikad.
Dugang ni Baste nga ang hukom sa mga suspek mamahimong mas makahulugan unta sa pamilya sa mga biktima kung naduso na kaniadto ang anti-terror law.
Mipadayag sab ug pagpasalamat ngadto sa mga survivors ug pamilya sa mga namatay nga ipadayon ang kaso batok sa mga luyo sa daghanang hagit nga gi-atubang.
Kahinumduman nga adunay nakitang lig-on nga basehan ang Taguig Court aron nga hukman sa salaod nga ilang nahimo ang mga suspek nga sila si Tagabawa Macabalang, Wendel Apostol Facturan, Musali Urbano Mustapha, Jessie Vincent Ginto Original, Zack Haron Lopez, Jackson Mangulamas Usi, ug Ausa Abdullah Mamasapano gumikan sa kasong multiple murder ug frustrated multiple murder diin gihukman nga mabilanggo sa ilang tibuok kinabuhi ang mga akusado.
Kinahanglan sab nga bayaran sa mga suspek ang kabanay sa mga biktima ug tig-P350,000 matag usa isip civil indemnity, moral, exemplary ug temperate damages ingon man P150,000 matag usa isip moral, exemplary ug temperate damages alang sa 69 ka mga naangol sa pagpamomba.
Hinuon dili guilty ang mga akusado sa kasong terrorismo human nga napakyas ang prosecution nga mapatud-an kini.
Samtang gikalipay sab ni P/Capt. Omelito Sobrecarey, deputy commander sa Tugbok PNP bana sa namatay nga Evelyn ang nahimong hukom sa korte ug dili lamang mawad-an ug paglaom nga makab-ot ang hustisya.
