Nabalaka si Davao City Mayor Inday Sara Duterte-Carpio nga malangan na sab ang panaghinabing pangkalinaw tali sa CPP/ NDFP gumikan sa padayon nga mga panagsangka sa tropa sa kagamhanan ug sa mga rebeldeng komunista sa Astorga, Sta. Cruz, Davao del Sur niadtong Sabado, Abril 21 ug niadtong Abril 19 sa Sitio Tadok, Barangay Kapatagan, Laak, Compostela Valley Province ug Sitio Casiras, Barangay Upper Bala, Magsaysay, Davao del Sur.
Sumala sa mayor nga pagpakita pa gihapon kini nga dili gayud matinud-anon ang mga CPP/NPA/ NDFP alang sa subling pag-abli sa hisgotanang pangkalinaw gumikan kay tataw nga magsegi gihapon ang pagpangatake niini sa tropa sa kagamhanan.
Sumala pa kang Mayor Inday nga gumikan kay gi-deklara nga teroristang gupo ang mga rebeldeng komunista, dili sab sila mopadayon sa localized peace talks, ug mopunting na lamang sila sa pagpalambo sa mga komunidad nga anaa ang presensya sa mga rebelde.
Gi-awhag sab ni Mayor Sara si Pangulong Duterte nga bawi-on niini ang tinguha nga subling ablihan ang panaghinabing pangkalinaw gumikan kay dili sensero ang CPP/ NPA/ NDFP.
