DAVAO CITY – Gitugtan na karon sa Davao City Local Government Unit (LGU) magbuhi og baboy ang pipila ka mga barangay sa dakbayan nga kaniadto kontaminado sa African Swine Fever kon ASF. Matud pa ni Gay Paler, Chief, Animal Husbandry and Disease Control Division City Veterinarian Office duha ka sentineling procedure ang gibuhat nila kaniadtong Hunyo, 2022 sa Baranggay Inayangan, Domingga, Lamanan, Magsaysay, Dalag Lumot ug Colasas nga nagpabilin karon sa Pink Zone aron makasiguro nga ASF free na ang maong mga bahin ug luwas na nga makabuhi og mga baboy. Dugang pa ni, Paler nga nagpahigayon sila og environmental swabbing ayha sila nagbutang og mga live animals. Sa ikaduhang bahin, nigahin na og P27 milyon nga kantidad sa ayuda ang lokal nga pangamhanan ngadto sa kapin 4,500 affected farmers alang lamang masiguro nga dili na makasulod sa syudad ang mga baboy nga adunay ASF ilabina sa mga baboy nga nahimutang sa ASF red zone sama nalang sa Davao del Sur, Isulan, Sultan Kudarat, Panabo City ug Tagum City. Sa pagkakaron, target karon sa Davao City nga mabutang sa yellow zone gikan sa pink zone ang mga lugar nga naapektuhan sa ASF ning syudad bag-o matapos ang tuig.
