Mitug-an ang aktres nga si Liza Soberano sa usa ka podcast nga nakasinati siya og pagpangabuso ug pagpasagad sa iyang pagkabata.
Gibutyag ni Soberano nga nasugapa matud pa sa crystal meth ang iyang Amerikanang inahan samtang nalambigit sa ilegal nga kalihokan ang iyahang amahan nga Pilipino nga miresulta sa deportasyon niini.
Nabiyaan sila uban sa iyahang manghod nga lalaki sa dili pa gayud kasaligan nga mga tawo ug napugos siyang mupuyo uban sa uyab sa iyang inahan sa usa ka kinawat nga van.
Nahimong balita pa siya kaniadto isip usa ka bata nga nakasinati og bayolenteng binuhatan sa pipila ka tawo.
Gipadayag usab ni Soberano nga giantos niya ang kaulaw ug kagutom sa usa ka foster guardian hangtod nga nadiskobrehan kini sa usa ka social worker.
Bisan pa sa kasakit nga kasinatian, giangkon niya nga ginahadlok matud pa siya aron nga protektahan ang inahan, hinungdan nga mamakak siya sa mga otoridad.
Si Liza usa sa mga ilado nga aktres dinhi sa nasud sa Pilipinas, lakip na usab sa abroad.`
