DAVAO CITY – Gibalibaran sa lokal nga kagamhanan ang hangyo sa usa ka kompanya sa ilimnong makahubog nga tugtan sila nga mamaligya sa ilang produkto luyo sa gipatuman nga 24/7 liquor ban nga usa sa mga sumbanan aron nga makunhuran ang kaso sa coronavirus disease 2019 (COVID-19).
Sumala pa kang Mayor Sara Duterte-Carpio, nakadawat siya ug sulat gikan sa kompanya nga mihanyo kaniya nga kung mamahimo na sila nga makapadayon sa pagpamaligya ug ilimnon nga una ng gibabagan sukad nga gipatuman sa lokal nga kagamhanan ang ban halos duruha ka bulan na ang milabay.
Gitataw sa Mayor nga bisan dako ang natabang sa kompanya sa food relief efforts sa lokal nga kagamhanan, dili pa mamahimong tugtan sa kasamtangan ang pagpamaligya ug ilimnong makahubog.
Dungan sumala pa sa extension sa general community quarantine (GCQ) hangtud Hunyo 15, gibarugan ni Mayor Inday nga magpabilin ang 24/7 ban sa mga ilimnong makahubog.
Buot sa lokal nga kagamhanan nga lugwayan ang liquor ban sanglit adunay nakumpirma nga kaso COVID-19-positive patients nga natakdan human kini nakig-inom.
Gilugwayan sa Inter-Agency Task Force For the Management of Emerging Infections ang pagpatuman sa GCQ hangtud Hunyo 15 sa mga siyudad sa Davao ug Zamboanga.
