Gipaklaro ni Department of Science and Technology (DOST) Secretary Renato Solidum, Jr. sa publiko nga ang mga kusog nga linog nga niigo sa nagkalain-laing bahin sa nasod sa bag-ohay nga mga semana wala nagkakonekta sa matag usa.
Daghang probinsya, lakip na ang Cebu, La Union, ug Davao Oriental, ang nakasinati og tagsa-tagsa ka mga pagtay-og.
Apan, giklaro sa PHIVOLCS nga ang matag linog naggikan sa lain-laing aktibong faultlines ug nahitabo nga independente sa usag usa.
Una nang nagpahinumdom ang PHIVOLCS nga ang lokasyon sa Pilipinas nga anaa sa Pacific Ring of Fire hinungdan nga natural gayud nga kanunay kini makasinati og mga linog.
Bisan pa sa sunod-sunod nga mga linog karong panahona, gibutyag sa mga eksperto nga kini normal nga geological occurrences lamang.
Gibutyag usab sa opisyal nga walay makasulti kung asa ang sunod nga linog.
Sumnala pa ni Solidum nga ang tibuok nasod, gawas sa Palawan Island, kasagaran gayud makasinati og kusog nga linog tungod sa presensya sa mga fault lines sa palibot sa Pilipinas ug sa mga isla mismo.
Gipahimangnoan usab niini ang publiko nga ang mga fault lines sa yuta ug ilawom sa dagat susamang nakatampo sa kanunay nga kalihukan sa yuta sa nasod.
Gi-awhag sa opisyal ang mga Pilipino nga magpabiling andam ug siguruhon nga ang ilang mga balay ug lugar sa trabaho nagsunod sa safety standards aron malikayan ang dakong kadaut ug katalagman kung aduna man gani umaabot nga linog.
