DAVAO CITY – Sukad nga gipatuman ang enhanced community quarantine kaniadtong bulan sa Abril ning kasamtangan nga tuig, nakapagula na matud pa ang Lingap para sa Mahirap Center ug P5 milyones ka pesos alang sa cremation services sa halos 200 ka mga patay’ng lawas lakip na kadtong gikatahapan nga nakaangkon ug coronavirus disease (Covid-19) kini aron makunhuran ang suliran sa mga nahibilin nga pamilya niini.
Sumala pa kang Lingap officer-in-charge Josephine Mitaran ang ilang buhatan ang gitahasan nga mag-asikado sa cremation ug direct burial sa mga Covid-19 patients lakip na kadtong mga gikatahapan ug nagpositibo nga anaa sa 168, sukad sa milabay nga Hulyo 10.
Kahinumduman nga ang Lingap usa ka City Government program nga mohatag ug assistance kalakip na ang hospitalization, funeral/burial, ingon man medisina sa mga residente sa dakbayan sa Davao.
Kahinumduman nga una ng nagpagula ug kamandoan si Mayor Sara Duterte-Carpio kaniadtong bulan sa Abril nga abagahon sa siyudad ang financial assistance sa mga apektadong pamilya sa Covid-19 patients.
Nasayran nga ang kuwarta sa cremation services ang kabahin sa Bayanihan grant sa national government nga nagkantidad ug P462 million.
