Magpabilin nga abli ang mga opisina sa Lingap sa main office ug satellite branches sa Bunawan, Calinan, Marilog, Paquibato, Poblacion, ug Toril karong Mayo 1, 2025, aron padayon nga motabang sa mga nanginahanglan. Bisan pa sa pagsaulog sa Labor Day, magpakabana gihapon ang ahensiya alang sa serbisyo publiko.
Ang mga private ug public desks sa maong mga opisina andam nga modawat ug motubag sa mga hangyo alang sa medical assistance. Kini nga lakang usa ka paagi sa Lingap aron ipakita ang ilang suporta sa mga trabahante ug sa komunidad nga nanginahanglan og medikal nga tabang bisan sa holiday.
Gani, gipakita sa Lingap ang ilang tinuod nga pagserbisyo isip kauban sa katawhan, diin ang pagpaabot og tabang walay gipasangil nga adlaw o okasyon. Ang ilang padayon nga operasyon nagpasabot sa seryosong paningkamot sa pagtabang sa mga masakiton ug kabus nga sektor sa dakbayan.
