Gipadayag sa Bangko Sentral ng Pilipinas (BSP) nga ilahang giusisa ang posibilidad sa pagpahamtang og limitasyon sa kantidad sa kuwarta nga mahimong i-transfer o i-withdraw gikan sa mga bangko, isip kabahin sa ilahang lakang batok sa sayop nga paggasto sa pondo sa gobyerno, ilabi na sa mga proyektong pang-imprastruktura.
Matod ni BSP Governor Eli Remolona Jr., hapit na matapos ang mga bag-ong polisiya nga magahatag og gahum sa mga bangko sa pagdumili sa mga kadudahan nga transaksyon, human sa pagtakda og P500,000 nga adlaw-adlaw nga withdrawal limit.
Miulbo ang isyu human kini pangutan-a sa mga mambabalaod, nga nagsaway sa Land Bank tungod sa pagtugot sa usa ka kontraktor nga maka-withdraw og dul-an tunga sa bilyon nga kantidad sa salapi sulod lamang sa duha ka adlaw.
Depensa sa bangko, igo lamang sila mituman sa hustong proseso ug awtorisasyon.
Giklaro ni Remolona nga sa ilawom sa bag-ong polisiya, mahimo na karon nga mobalibab ang mga bangko sa transaksyon kon adunay kadudahan sa kurapsyon, ug obligasyon usab nila ang pagsumite og Suspicious Transaction Reports (STRs) kung adunay kadudahan sa lihok sa kuwarta.
Iyang gibutyag nga ang mga iregularidad sa paggasto sa pondo makaapekto gayud sa ekonomiya sa nasod.
Dugang niya, mahimo unta nga moabot og 6% ang pagtubo sa ekonomiya kon nagamit lang og husto ang pondo alang sa imprastruktura.
