DAVAO CITY – Laoman nga madungagan pa ang ihap sa mga tulonghaan sa dakbayan sa Davao nga mamahimong kabahin sa face to face classes pagsulod sa bulan sa Enero sa mosunod nga tuig.
Kahinumduman nga una ng gibutyag ni Davao City Mayor Inday Sara Duterte-Carpio nga ang lima ka mga public schools dinhi sa dakbayan nga girekomenda nga magsugod sa ilang F2F classes sa Enero ang gilangkuban sa Dalagdag National High School, G. Tajo National High School, Saloy National High School, Mabuhay Elementary School (nga naila karon nga Victor Bernal Integrated School with Kindergarten) sa Barangay Mabuhay, ug Gumitan Elementary School.
Nakapahigayon na matud ang Department of Education ug inspeksiyon ug aprubado na kini sa ahensiya. Una na sab nga gibutyag ni Jenielito Atillo, tigpamaba sa Department of Education 11 (DepEd 11) nga ang nahisgutang lima ka mga tulonghaan sa siyudad ang nauna ng nahilakip sa 18 ka mga eskwelahan sa Davao Region nga gitugtan nga makapahigayon ug face-to-face classes apan pipila niini ang temporaryo nga gisuspende tungod gumikan sa pag-usob-usob sa quarantine classification.
Gikanayong pipila sa mga tulonghaan nga kalakip sa mag-F2F classes ang anaa sa low-risk sa Covid-19.
