DAVAO CITY – Gawasnon na sa insurhensiya ang lima ka probinsya sa rehiyon sa Davao. Ulahing gideklarang “insurgency free” ang Davao Oriental.
Kahinumdumang nag convene ning nakalabay’ng September 19 ang Provincial Peace and Order Council diin giaprubahan ang resolution nga nagdeklarang gawasnon sa insurhensiya ang Davao Oriental.
Gikabutyag usab ni Capt. Mark Anthony Tito ang spokesperson sa 10thID PA, nga wala nay nagbarog pa nga NPA Guerilla Front sa rehiyon homan sa ilang intensive military operation ug ang pagpatuman sa whole-of-the-nation approach.
Sa pikas bahin, bisan paman nga gawasnon na sa insurhensiya ang tanang probinsiya sa rehiyon apan dili pa pormal nga matawag nga insurgency free ang Davao Region sanglit wala pay gi aprubahang resolution ang Regional Peace and Order Council.
Aminado ang opisyal nga dakong hagit kanila ang pag mentina sa nakab-ot nga kadaugan busa gitinguha sa han-ay sa kasundalohan na mapatuman ang pagtubag sa mga nag-unang proyekto ug serbisyo alang sa katawhan aron dili na kini magamit sa pagpanglinla sa walhong grupo.
