DAVAO CITY – Lima ka tunghaan sa Dakbayan sa Davao ang posibleng mahilakip sa pagpalapad sa limitadong face-to-face classes.
Gibutyag sa tigpamaba sa Department of Education XI nga si Jenielito Dodong Atillo nga ila nang gisumite ang rekomendasyon gikan kang Davao City Mayor Sara Duterte ngadto sa opisina ni DepEd Secretary Leonor Briones.
Ang lima ka tunghaan ang nahimutang sa Ikatulong Distrito sa Dakbayan, diin dunay gamay lamang nga ihap sa COVID-19 cases ang natala.
Dugang pa sa opisyal nga sagad sa mga nag-qualify nga mga tunghaan ang dili kaayo daghan og populasyon ug dunay maayong COVID-19 control measures sa ilang dapit.
Nagahulat na lang sab sila sa pagtapos sa pilot implementation sa limited physical classes aron nga masugdan ang klase sa maong mga eskwelahan.
Sa kasamtangan, lima ka public schools sa Davao de Oro ug tulo sab sa Davao del Sur, ug usa ka pribadong eskwelahan sa Davao City ang nagapahigayon sa in-person nga klase.
Apan, mahunong ang kasamtangang pilot implementation o di kaha masibog ang sunod nga hugna sa face-to-face classes ug galing mapailawom sa Alert Level 3 status ang Davao Region tungod sa padayong pagsaka sa COVID-19 cases, matud ni Atillo.
