Giklaro sa Davao City Police Office (DCPO) nga walay “ligis-bayad” nga modus nga naglihukan dinhi sa dakbayan sa Davao. Kini human nakuhaan og video ang usa ka lalaki nga misulod ilawom sa sakyanan samtang na-traffic ug nagpa-ligis sa Buhangin, Davao City niadtong Lunes sa gabii.
Sumala pa ni DCPO spokesperson P/Capt. Hazel Tuazon, nga subay sa imbestigasyon sa Buhangin Police Station, ang lalaki nga naligsan sa sakyanan, usa ka tawo nga adunay mental challenge. Sumala pa sa kabanay sa wala panganli nga lalaki nga wala nila mabantayi nga nakagawas siya sa ilahang balay.
Dugang pa nga gipahayag ni Tuazon nga nangayo ang kapulisan og psychiatric examination result gikan sa pamilya, ug samtang naghulat sa resulta, nagpadayon usab ang imbestigasyon sa Buhangin Police Station.
Subling gipaklaro sa opisyal nga walay ingon niini nga modus nga magpaligis aron lamang makakwarta dinhi sa dakbayan sa Davao. Sa pagkakaron anaa na sa stable ang kahimtang sa usa ka hamtong nga lalaki.
