Nagsugod na sa pag-apod-apod og mga libreng sports equipment ang Davao City Sports Development Division (SDD) sa upat ka tunghaan isip kabahin sa implementasyon sa Aktibo Dabawenyo School for Sports Training Program.
Tumong sa maong programa nga masiguro nga ang mga coach makahimo og organisado, luwas, ug epektibong mga training sessions nga uyon sa tumong sa Aktibo Dabawenyo Program.
Lakip sa mga gipang-apod-apod nga gamit mao ang mga baton, shot put, discus, ug javelin para sa athletics; mga bola, cones, agility ladders, goalkeeper gloves, ug agility hurdles para sa football ug futsal; nets, cones, ug kicking pads para sa sepak takraw; ug focus mitts, double kick pads, chest protectors, ug head gears para sa karatedo ug taekwondo.
Nakadawat na og mga gamit ang Davao City National High School niadtong Hulyo 1, samtang gikatakda nga nahatagan usab ang A.L. Navarro National High School miadtong Hulyo 3.
Niadtong Hulyo 4, Crossing Bayabas National High School ang misunod nga nakadawat sa mga equipment, ug sa katapusan nga semana sa Hulyo, ang Tugbok National High School ang gikatakdang mahatagan alang sa ilang sports training.
Gilauman sa lokal nga panggamhanan sa Davao nga pinaagi sa maong inisyatiba, mapalig-on pa ang sports development ug mapadasig ang mga kabatan-onan nga mosalmot sa aktibo ug kompetitibong kalihokan sa sports.
