Miarangkada na karong adlawa ang Libreng Sakay sa Public Utility Bus dinhi sa dakbayan sa Davao sa pagpanguna sa Department of Transportation (DOTr) sa paglusad sa labing unang Libreng Sakay program niini sa Mindanao, pinaagi sa mga bus nga molatas sa rutang Lasang padulong Roxas via Sasa sa ning dakbayan sa Davao.
Kini usa ka tubag sa DOTr, uban ang pakigtambayayong sa Land Transportation and Franchising Regulatory Board (LTFRB),sa mando sa Presidente nga pahupayon ang adlaw-adlaw nga kalisod sa mga komyuter sa biyahe ug pamasahe.
Sumala pa ni Sec. Dizon nga kinahanglan nga tabangan ang mga kaigsoonan, ilabi na ang mga komyuter. Sumala pa nga gimanduan sa pangulo ang DOTr nga mangita og paagi aron matabangan ang mga komyuter, ilabi na ang mga estudyante ug senior citizens sa tibuok nasud.
Gikalipay usab sa mga pasahero ang nahimong programa sa gobyerno nga sumala pa gikan sa Lasang padulong sa Downtown, Php100 ang roundtrip.
Tungod niini anaa sa Php500 ang matigom kada semana sa unom ka libo nga pasahero nga mosakay sa maong ruta matag adlaw.
Gisusi na usab sa DOTr ug LTFRB ang posibilidad nga dugangan pa ang mga bus nga magdagan sa maong ruta, ug pagdugang usab og mga ruta nga libreng sakay, sama sa dapit sa Cabaguio.
Nagpahibalo usab ang DOTr nga Php70 milyon matag tuig ang gi-andam nga budget alang sa maong Libreng Sakay program, nga magdagan gikan alas 6 hangtod sa alas 9 sa buntag ug alas 5 hangtod sa alas 8 sa gabii, matag adlaw, lakip ang weekend ug holiday. magpadayon ang libreng sakay hangtod sa tuig 2028.
Sa pagkakaron, adunay inisyal nga walo ka mga bus ang magabyahe sa matag adlaw dinhi sa dakbayan sa nasampit nga mga oras.
