Nagduso karon si Majority Leader Ferdinand Alexander Marcos og sugyot balaodnon nga maghatag og libreng kuryente sa mga pamilyang ubos og konsumo sa kuryente.
Ubos sa House Bill No. 2700 o “Free Electricity for Low-Consumption Households Act,” tubagon sa gobyerno ang tibuok bayrunon sa kuryente sa mga kwalipikadong panimalay.
Dili usab pahamtangan og 12% VAT ang subsidiya nga ihatag. Sakop sa maong sugyot ang mga panimalay nga mogamit og dili molapas sa 135 kilowatt-hours (kWh) matag bulan o adunay bayrunon nga dili molapas sa P2,000, bisan asa ang mas ubos.
Kinahanglan kini nga mapamatud-an sa Energy Regulatory Commission ug sa Department of Energy.Tumong sa maong sugyot nga pulihan ang kasamtangang sistema sa lifeline rate diin ang ubang konsyumer maoy nagbayad sa subsidiya sa mga kabus.
Sa bag-ong sistema, direkta na gikan sa gobyerno ang pondo aron mas patas ug mas klaro ang paghatag og tabang.
Mag-isyu og zero-charge bill ang mga distribution utility sa mga kwalipikadong benepisyaryo ug mosumite og reimbursement sa DOE, nga ipa-audit sa Commission on Audit.
Samtang kabahin niini, matod ni Cong. Sandro Marcos, gipasayon usab ang aplikasyon sa Lifeline Rate Subsidy Program aron mas daghang kabus nga pamilya ang makabenepisyo.
