Nagpatuman ang City Health Office (CHO) sa Davao City og regular nga cardiovascular ug diabetes check-up matag Biyernes, gikan alas 8 sa buntag hangtod alas 5 sa hapon, aron mas mapalig-on ang pagtubag sa kahimtang sa panglawas sa katawhan.
Giatiman sa programa ang mga pasyente nga dunay cardiovascular diseases (CVD) ug diabetes, ilabi na ang 11,750 ka kaso sa Type 2 diabetes nga narekord sa siyudad gikan Enero hangtod Hunyo 2025.
Lakip sa serbisyo ang assessment, screening, ug diagnosis, samtang gihatagan usab og impormasyon ang mga pasyente kabahin sa husto nga pagdumala sa ilang kondisyon.
Matud ni Dr. Shri Angelo Reyes, Medical Coordinator sa Non-Communicable Diseases sa CHO, gikan kini sa datos sa City Information Office (CIO).
Gipasabot niya nga kaniadto, mga 40 anyos pataas ang kasagarang matakdan sa diabetes, apan karon misulod na kini sa 30 anyos pataas tungod sa family history, sedentary lifestyle, kakulang sa ehersisyo, pagkaon nga walay nutrisyon, ug edad.
Gipasabot usab nga kung miyembro ang pasyente sa PhilHealth Konsulta Program, aduna kini’y access sa libreng Random Blood Sugar (RBS) ug Fasting Blood Sugar (FBS) tests sa mga health center.
Ang RBS test kay mahimong makuha sa barangay health stations ug district health centers sa kantidad nga Php 50, samtang ang FBS kay Php 120.
Gidasig sa CHO ang publiko nga magpacheck-up ug magpascreening aron malikayan ang mas komplikado nga balatian sa umaabot.
