DAVAO CITY – Mipatuman gilayon ang Davao City Disaster Risk Reduction and Management Office (CDRRMO) ug forced evacuation sa pipila ka mga residente nanimuyo daplin sa kasapaan kagabie human nga nakasinate ug kusog nga pagbaha partikular na ang Talomo ug bangkal area.
Sayo nga mipahimangno ang ahensiya human walay undang nga pagbundak sa ulan ug nakadawat na sab sila ug impormasyon nga paspas ang pagsaka sa water level sa bukiron nga bahin sa siyudad hatud sa mipatigbabaw nga trough of low pressure area (LPA).
Una nga nag-over flow ang Barangay Balengaeng creek tributaries sa Talomo River, nga miresulta sa pugsanon nga paghikling sa liboan ka mga residente nga nanimuyo daplin sa kasapaan.
Subay sa flood-prone area coverage map sa CDRRMO, pipila sa mga barangay nga apektado ang gilangkuban sa Talomo Proper, Los Amigos, Catalunan Pequeño, Tugbok, ug Riverside.
Sumala pang CDRRMO head Alfredo Baloran, mipatuman gilayon ug pagpahikling sa ilang mga residente ang Barangay Disaster Risk Reduction and Management Centers (BDRRMCs) sa mga nanimuyo sa Talomo River channels, ilabi na sa Talomo Proper.
Hugtanon sab sumala pa nila nga gimonitor ang mga areas nga delikado sa mga pagbaha, street flooding, ug landslides. Gawas sa Talomo, kalakip sab sa gibantayan ang mga barangay nga duol sa Lipadas River (Lubogan, Toril Poblacion, Crossing Bayabas, Lizada, ug Marapangi), Matina River (Matina Pangi, Matina Crossing, ug Matina Aplaya), ug Davao River (Tamugan, Callawa, Mandug, Tigato, 19-B, Ma-a, 10-A, Matina Crossing, Bucana, 1-A,2-A, 5-A, 8-A, and 9-A), Bunawan River (Bunawan), Lasang River (Lasang), Panacan Creek, Bago Creek (Bago Gallera ug Bago Aplaya), ug Mintal Creek (Mintal ug Sto. Niño).
Gimando sab dayon sa BDRRMCs ang pagpatuman ug physical distancing sa mga bakwit ug gipahimangnoan ang mga nahisgutan nga magsuot ug facemask.
