Suspendido ang usa ka Liaison Officer sa Barangay Ilang gumikan matud pa sa pagkibhag sa ayuda sa pipila ka mga benepisyaryo sa programang Ayuda sa Kapos ang Kita (AKAP) sa Department of Social Welfare and Development (DSWD).
Giila ang maong opisyal nga si Virginia Servera,subay sa nahimong kumpirmasyon ni Barangay Ilang Kapitan Amado Babao.
Gani, sukad pa niadtong Setyembre 16 kini gisuspende ug mulungtad hangtod Oktobre 16 ning tuiga aron sab nga mahatagan og taas nga panahon ang mag-imbestiga sa reklamong gikalambigitan sa naasoy nga indibidwal.
Apan, og malapas og usa ka bulan di gihapon mamahimong tin-aw ang ngan ni Servera, lugwayan ang suspension order. Sa higayon sab nga mapamatud-an ang alegasyon, gilayong i-terminate ni Kap. Babao si Servera.
Samtang giklaro ni Babao nga wala siya masayod sa nahitabong pagkibhag sanglit wala miagi sa iyang kamot o opisina ang listahan sa mga benepisyaryo sa ayuda.
Subli sab nanawagan ang kapitan nga og dunay mga mabiktima sa susamang panghitabo, gilayon dayon kining itaho aron maaksiyunan.
