Nagpaguwa og kamanduan ang probinsyal nga kagamhanan sa Davao Oriental sa tanang lumulupyo sa maong probinsya nga likayan una ang panagtapok karong panahuna human sa nahitabong pagtay-og sa nakalabay nga semana.
Subay sa gipagawas nga Executive Order No. 77, Series of 2025, gimanduan ang tanang ahensya sa gobyerno ug pribadong sektor sa probinsya nga likayan ang pagpahigayon og mga kalihokan o aktibidad nga makapatapok sa katawhan aron malikayan ang unsa man nga dili matag-an nga panghitabo ilabi na sa linog.
Sumala pa sa probisnyal nga kagamhanan nga gipaguwa kini nga kamanduan isip kabahin sa usa ka kritikal nga lakang sa pagpangandam ug pagpanalipod sa katawhan tungod sa sagunson nga kusog nga linog nga nakahatod og kadaot sa pipila ka lugar og nakakalas og mga kinabuhi sa nasampit nga probinsya.
Partikular nga gimanduan ang tanang buhatan sa gobyerno, eskwelahan, simbahan, ug lakip ang pribadong organisasyon.
Ipatuman usab ang temporaryo nga pagkansela sa mga dagko nga panagtigum sama sa concert, sports events, fiesta ug uban pang kalihukan hangtod nga makompleto ang gihimong assessment sa kaluwasan sa mga estruktura alang sa mga katawhan.
Kahinumduman nga hangtod karong panahuna nakasinati gihapon ug linog ang nasampit nga probinsya nga kabahin sumala pa sa aftershocks nga natala sa Phivolcs human sa 7.4 ug 5.8 nga linog.
