Gilauman sa kampo ni kanhi Presidente Rodrigo Duterte nga mopagawas og desisyon ang International Criminal Court (ICC) sa ilang interim release request sulod sa usa ka buwan.
Matud sa lead counsel nga si Atty. Nicholas Kaufman nga ang ICC kinahanglang molihok dayon basi sa balaod sa Roma.
Plano usab sa depensa nga mangayo og pagtugot nga mosang-at og tubag sa argumento sa prosekusyon batok sa temporaryong kagawasan ni Duterte, daw tungod sa iyang pag-ilis sa nasud nga pinuy-anan.
Giinsistir ni Kaufman nga wala siyay rason nga kuwestiyonon ang integridad sa mga huwes sa ICC, bisan pa nga gibalibaran ang ilang hangyo nga i-disqualify ang duha ka judge nga nalambigit sa miaging drug war probe.
Iyang giangkon nga gusto unta sa kampo nga mobalik sa Pilipinas si Duterte bisan temporaryo lang, apan klaro nga dili kini dawaton sa gobyerno.
Nagdumili usab siya sa pagkumpirmar sa mga taho nga ang Belgium ug Australia nagdumili sa pagdawat kang Duterte, nga giingon nga adunay kalibog lamang sa kasayuran.
Gipanghimakak usab ni Kaufman ang sugyot nga si Duterte mahimong mangayo og legal nga proteksyon ubos sa Dutch nga balaod samtang anaa sa kustodiya sa ICC – usa ka sugyot nga unang gipasaka sa pipila ka mga abogadong Filipino.
