Adunay plano ang Los Angeles Lakers nga dunganon sa pagpadula sa court ang mag-amahang LeBron ug Bronny James sa pag-abre sa 2024-2025 Season sa National Basketball Association (NBA).
Sa pagkakaron, magkauban nga nag-training ang mag-amahang Lebron ug Bronny, isip pagpangandam sa nagkaduol na nga pag-abre sa bag-ong season sa NBA.
Bisan paman nga dili pa opisyal nagsugod ang team workout sa Los Angeles Lakers alang sa pag-abre sa bag-ong season, nagsugod na ang mag-amahan sa ilahang training kauban ang pipila ka training staff sa LA.
Kung kahinumduman, nagbakasyon una si LeBron ug duha ka semana homan ang pagdula sa Team USA niadtong Paris Olympics.
Kini ang pinakauna sa kasaysayan sa NBA nga dungan magdula sa usa ka team ang mag-amahan. Sa kasamtangan, 19-anyos na ang 6’2 nga si Bronny samtang ang amahan niini ang anaa sa pangidarong 39-anyos.
