Nasikop sa hiniusang pwersa sa otoridad ang ika upat nga suspetsado ug ginatudlo usab nga leader sa nahitabo nga pagpangawat ug pagpatay kang Sophia Coquilla sa Tagum City kaniadtong Hulyo 9.
Nadakpan ang suspetsado dinhi sa dakbayan sa Davao, kaganinang alas 12:05 sa udto, Hulyo 12, sa Corner Lakandula ug Lapu-Lapu St., Barangay Agdao Proper, ning siyudad.
Ang suspek giila nga si Roilan Lupogan alyas Roy-roy, apan, nasayran sa kapulisan nga ang iyang tinuod nga pangalan mao si Roylan Gabriel Ampan, hamtong ang pangidaron, nga residente sa Sitio Logdeck, Barangay Caningag, Caraga, Davao Oriental.
Sa pag rekisa sa kapulisan, narekober sa dinakpan ang usa ka .38 nga revolver nga adunay duha ka bala, diin nasayran usab nga wala’y gikapakita nga mga dokumento ang suspetsado sa maong armas.
Sa pagka karun, anaa na kini sa kustodiya sa kapulisan ug mag-atubang og patong-patong nga mga kaso.
Kahinumdomang una na nga nadakpan ang tulo ka mga kauban niini nga pulos mga menor de edad ngadto sa Tagum City.
