DAVAO CITY – Gilugwayan na sa Island Garden City of Samal ang last trip sa Samal Ferry Wharf ngadto sa alas 11 sa gabii gikan sa alas 9 sa gabii.
Matud ni IGACOS Mayor Al David Uy, nahitabo ang adjustment sa last trip human nga gi-lift na sa Davao City LGU ang 9pm to 4pm nga curfew niini.
Plano usab nga lugwayan pa sunod bulan sa IGACOS LGU ang oras sa last trip sa mga ferry o di kaha ibalik ang 24-hour operation niini, apan magdepende kini sa sitwasyon sa COVID-19 sa ilang isla.
Kamatikdan nga padayong nagaubos ang mga matalang kaso sa nasangpit nga kagaw sa tibuok Davao Region.
Sa pikas bahin, ning bag-uhay lang, gibalik ang mga biyahe sa bus sa Davao City ug IGACOS human ang lapas usa ka tuig nga suspensyon niini tungod sa pandemya.
Alas 6 sa buntag ang first trip sa Davao-Kaputian route o vice versa ug alas 6 sa gabii usab ang last trip niini.
Hinay-hinay na usab nga ginabalik sa isla ang operasyon sa ilang tourism industry, ug laraw usab sa maong LGU nga tugutan ang mga fully-vaccinated nga turista gikan sa gawas sa Davao Region nga makasulod sa ilang isla.
Parehong anaa sa Alert Level 3 ang Davao City ug IGACOS, nga sakop sa Davao del Norte.
