DAVAO CITY – Nagkadiayang mga hinagiban ang nakompiska sa mga personahe sa Bureau of Jail management ang Penology atol sa gipahigayon niining Joint Greyhound Operation sa Davao City Jail-Male Dormitory jail facility pasado alas tres kagahapon sa kaadlawon.
Lakip sa mga nakompiska sa mga otoridad ang nagka-lain laing matang sa deadly weapons sama sa tubo, Indian pana, paddles, cell phones ug mga kuwarta.
Gipahigayon ang nahisgutang operasyon human makadawat ug inter report ang BJMP labot sa nakalusot nga mga illegal nga butang sulod sa prisohan.
Giangkon ni Davao City jail Warden Jail Supt. Peter Bongngat, naa lamang gihapoy makalusot nga mga kontrabando luyo sa ilang gipatuman nga istriktong seguridad sa mga mobisita sa mga piniroso.
Gikumpirma usab ni Bongngat nga walay nakompiskang mga illegal nga druga atol sa gilusad nga operatioin grayhound sa prisuhan.
Gibutyag usab sa maong opisyal nga dili nila kaya nga sila-sila lang ang molusad sa operasyon gumikan kay adunay pipila ka bahin sulod sa prisuhan ang dili sayon nila nga masulod hinungdan nga nagpatabang sila sa nagkadiayang mga ahensiya sa gobyerno.
Ang nahisgutang operasyon mao ang pinaka-una sukad nga nagsugod ang pandemya niadtong 2020.
Dugang pa sa nahisgutang opisyal nga sa kasamtangan nakasinati ug grabe nga kaguot ang Davao city jail sanglit moabot sa 2,623 ang mga nabilanggo dinhi nga persons deprived of liberty (PDL), gikan sa ideal capacity niini nga 600 lamang.
Samtang, gipasalig usab sa BJMP nga magpadayon lamang gihapon ang na-una nang gipatuman nga non contact visitation sa mga PDL.
