DAVAO CITY – Kabsan sa kinabuhi ang usa ka lalaki dihang napaakan kini sa usa ka banakon sa Davao Occidental. Giila ang biktimang si Renante Maligon, minyo ug residente sa Barangay San Pedro, Sta. Maria, Davao Occidental.
Sa usa ka video nga gi-post sa social media, nga putol-putol na ang lawas sa banakon human kini nga gitigbas sa mga nakakita nga mga residente.
Gisulayan pa sa biktima nga ipapaak sa bali nga sanga ang banakon aron masuta kon hingpit na nila kining napatay. Apan, wala pa nakuntento ang biktima dihang gipapaak mismo sa halas ang iyang kaugalingong kamot.
Pipila ka minuto, nitalab ang hilo sa maong halas ngadto sa biktima. Gisulayan pa sa mga kabanay ang pagtabang sa biktima apan nakabsan kini sa kinabuhi.
Gihaya na ang patayng lawas sa biktima sa ilahang panimalay.
Hingpit nga pahimangno ngadto sa katawhan nga dili hilabtan ang maong mananap ug mas maayong ipapatabang sa DENR ang pagkuha sa bisan unsang delikadong mga hayop aron gilayong mahibalik kini sa orihinal nga habitat.
via || Bombo LJF
