DAVAO CITY- Balhog karon sa prisohan ang usa ka lalake human kining makuhaan ug mapalitan og illegal nga droga atol sa gipahigayon nga buybust operation sa kapulisan sa Purok 18 FD Road #5, Barangay Tibal-og, Santo Tomas, Davao del Norte.
Sa impormasyon gikan sa Santo Tomas Municipal Police Station, nakuha sa posisyon sa dinakpan nga si Joseph Sidlao Ganade, 43 anyos, minyo, usa ka truck driver ug residente sa Purok 2, Barangay Sampao, Kapalong, Davao del Norte ang usa ka sachet sa gidudahang shabu, lima ka bala sa 9mm nga kalibre sa pistola ug kwarta nga P1,500.
Sa pagkakaron, napasakahan na og tukmang kaso ang maong dinakpan subay sa paglapas sa RA 9165 o Comprehensive Dangerous Drugs Act of 2002 ug RA 10591 o Comprehensive Firearms and Ammunition Regulation Act.
Samtang, nagpahimangno ang kapulisan sa tanan ilabi na sa mga tigpayuhot og iligal nga druga nga undangan na ang illegal nga binuhatan tungod bilangguan gayod ang ilang tugpahan.
