DAVAO CITY – Selda ang nahimong kapaingnan sa usa ka suspek nga gikatahong nanigbas sa iyang igsuon niadtong Sabado sa hapon, sa may Purok 4, Barangay Magwawa, Santo Tomas, Davao del Norte.
Giila sa Sto. Tomas Municipal Police ang suspek nga si Roger Patenio Alaban, 58 anyos, residente sa susamang dapit. Sumala sa report, ang kapitan sa barangay mismo ang nagtugyan sa suspek.
Sa inisyal nga imbestigasyon sa kapulisan, nasayran nga nag-inom ang suspek ug ang igsuong biktima nga giilang si Gibson Patenio Alaban, 46 anyos, sa balay sa suspek atol sa pagsaulog sa iyang birthday.
Apan naglalis kining duha tungod sa ilahang daang bikil nga misangko ngadto sa pagpanigbas sa suspek ngadto sa biktima gamit ang usa ka sundang.
Samaran ang biktima sa tuong abaga, bukton ug likod.
Kasamtangang nagpa-alim ang biktima sa Davao Regional Medical Center sa Tagum City, samtang gikatakdang mag-atubang og kaso ang suspek nga anaa sa kustodiya sa Sto. Tomas Municipal Police Station.
via || Bombo LJF
