Nakalingkawas sa kamatayon ang 17 anyos nga batan-ong lalaki human gidunggab sulod sa usa ka internetan sa Barangay Lagao.
Subay sa rekord, giila ang biktima nga si alyas Nognog ug nakaangkon og samad dinunggaban sa likod nga milahos paingon sa dughan.
Samtang, ang suspek giilang si alyas Niel ug unang gikataho nga dunay problema sa pangisip, apan gipaklaro nga anaa kini sa saktong huna-huna ug padayon nga nagatuon.
Subay sa imbestigasyon, napikon matud pa ang suspek ngadto sa biktima gumikan wala kini giundangan sa biktima ug sige’g tawagon nga “baho’g ilok”.
Midepensa ang amahan sa biktima nga di matud pa palaaway ang iyang anak gumikan prangka lamang kini ug iingon gayod og unsay mga nakita ug naobserbahan.
Hinoon, aminado matud pa ang amahan sa biktima nga duna silay sayop isip ginikanan gumikan wa matud pa nila naatiman pag-ayo ang ilang anak sukad mipuyo ang bata sa apohan niini ug misideline isip barker diin ang kwartang matigom, maoy igasto aron makadula sa internetan hangtod kadlawon.
Apan, giklaro sa ginikanan sa biktima nga di magkaila ang biktima ug suspek.
Kahinumduman misurender na ang suspek kauban ang ginikanan niini sa dihang nagviral kini sa social media.
Sa pamahayag ni P/Col Nicomedes Olaivar Jr. City Director sa General Santos City Police Office sa press conference, human nga ilang nasuta nga menor de edad ang nahisgutan ila gilayon kining giintrigo sa Bahay Pag-asa sa Barangay Sinawal.
