DAVAO CITY – Subli nga nagpahinumdom ang otoridad nga mipatigbabaw karun ang pagpatuman sa eleksiyon Gun ban hinungdan nga hugtanon nga gidili ang pagdala-dala ug armas gumikan kay dili sila magpanuko nga pangsikupon ang mga makalapas niini.
Anaa karon sa kustodiya sa Toril PNP ang usa ka 35 anyos nga lalaki kinsa nakuhaan kini ug peke nga military ID sa Task Force Davao Checkpoint sa Barangay Sirawan Toril District ug armas.
Naila ang nahisgutan nga si Ryan Calma, residente sa Kiblawan Davao del Sur.
Gikanayong sakay ang nahisgutan sa Mitsubishi L300 ug paingon dinhi sa dakbayan sa Davao.
Apan dihang gipahigayon ang inspeksiyon, nakuha sa iyang posisyon ang usa ka caliber .45 Rock Island pistol nga gi-undan ug tulo ka magazine nga adunay 36 ka mga bala, tactical knife ug fake military ID.
Tungod sa gihimo sa dinakpan, mag-atubang kini ug patong-patong nga mga kaso nga gilangkuban sa paglapas sa Commission on Elections (COMELEC) gun ban, illegal possession of firearms and ammunitions ug usurpation of authority.
Naghulat na lamang karon ang dinakpan sa mosunod nga kamandoan sa korte sa kaso nga iyang gi-atubang.
