Gipusil-patay ang usa ka lalaki sa tunga sa kalihokan sa Kalag-Kalag sa Tagum City, Nobyembre 2, 2025.
Sa report sa Tagum PNP, giila ang biktima nga si Robert Wangdali, 43 anyos, minyo, ug residente sa Purok Mansanitas, Barangay Magugpo West sa maong siyudad.
Matod ni PLTCOL Frederick Deles, hepe sa Tagum City Police, nga nagmaneho ang biktima sa iyang itom nga Honda RS single motorcycle gikan sa Gante Road padulong sa Purok Masagana, sa dihang kalit siyang gipusil sa wala mailhing lalaki gamit ang armas nga kalibre .45.
Napusilan kini sa makadaghang higayon, ug tungod sa grabeng samad pinusilan, didto dayon nakabsan sa kinabuhi ang biktima.
Narekober sa crime scene ang mga basiyong bala sa kalibre .45 pistol, samtang padayon pa karon ang imbestigasyon sa kapulisan aron matino ang motibo ug mailhan ang suspek sa maong krimen.
Gitutukan karon sa Tagum PNP ang kaso samtang nagpahinumdom sa publiko nga magpabiling alerto ug magreport dayon sa mga kahina-hinalang lihok.
