Nasikop ang usa ka lalaki nga nailhan lamang sa alyas Jeboy, residente sa Purok 1B, Barangay Magwawa, Santo Tomas, Davao del Norte, human kini manigbas sa iyang silingan nga si alyas Ronilo, 61-anyos, atol sa ilang panaglalis alas 5:30 sa hapon kagahapon.
Base sa imbestigasyon sa Santo Tomas Municipal Police Station (MPS), nagsugod ang insidente sa lalis sa duha nga midangat sa komprontasyon.
Sa kalit nga dinumugay, gikuha ni Jeboy ang sundang nga giangkon nga iya sa biktima ug mitigbas kini padulong sa liog ni Ronilo.
Dali kining nadala sa Municipal Health Center sa Santo Tomas ug dayon gi-refer sa Davao Regional Medical Center (DRMC) sa Tagum City aron mahatagan ug dugang medikal nga atensyon.
Samtang misibat ang suspek pagkahuman sa krimen, malampuson kining nadakpan sa operasyon ni Barangay Kapitan Armando Generosa kauban ang Regional Public Safety Battalion (RPSB).
Giturn-over kini sa Santo Tomas MPS ug karon nag-atubang og kaso nga Frustrated Homicide.
