DAVAO CITY – Patay ang usa ka 48 anyos nga lalaki human kini nabanggan sa usa ka truck alas 9:30 kagabii sa Mc Arthur Highway atubangan sa Gaisano Grand Mall of Toril.
Giila ang biktima nga si Almario Tiero Toñacao, lalake, 48 anyos, minyo, usa ka drayber ug residente sa KM17, Purok 1, Tibungco ning syudad.
Samtang ang nagmaneho sa Isuzu Truck nga maoy nakabangga sa biktima ang giilang si Jerry Agustines Guanao, lalake, 45 anyos, minyo, drayber ug residente sa Bago Aplaya ning dakbayan.
Subay sa inisyal nga imbestigasyon, gisaysay sa usa ka saksi nga mao si Evangelisto Baloan Labanon, 23 anyos, nga ang nasangpit nga sakyanan ang naglawig gikan sa crossing traffic light ug paingon sa Brgy.
Lizada, Babisa. Sa dihang miabot na kini sa lugar kung asa nahitabo ang insidente, kalit na lamang matud pa mitabok ang biktima sa kalsada dungan sa pag-left turn usab sa truck rason nga nabanggan ang biktima.
Gumikan sa kakusog, nalagpot kini ug naka-angkon og multiple serious physical injuries sa nagkadaiyang bahin sa kalawasan. Gidapatan pa ang biktima og First Aid sa Brgy Crossing Bayabas Medical Response Volunteers ug gidagan sa Brgy. Daliao Disaster Response Vehicle paingon sa Southern Philippines Medical Center (SPMC) apan gi-deklara kining patay sa attending physician.
Anaa na karon sa kustodiya sa Toril Police Station ang drayber truck diin gikatakda kining pasakaan og kasong Reckless Imprudence Resulting to Homicide.
BY BOMBO ALLIANE SILAO
