Patay ang usa ka wala pa mailhing lalaki human giingong malumos sa Punta Dumalag, Barangay 75-A, Matina Aplaya, Davao City, alas 6:30 sa buntag kagahapong adlawa Hulyo 16, 2026.Base sa imbestigasyon sa Police Station 15-Ecoland, samtang nangisda ang usa ka saksi nga mihangyo nga dili ipadayag ang iyang identidad, iyang nakita ang biktima nga nag-istorya pa sa cellphone sa wala pa kini milusong sa dagat aron maligo.
Matud pa niini, iyang gipahimangnoan ang biktima nga delikado ang paglangoy sa maong dapit tungod sa kusog nga sulog sa tubig, apan wala kini motuman.Makalabay ang pipila ka gutlo, nakita sa saksi nga naglisod na ang biktima sa tubig, maong nangayo dayon siya og tabang ug gitawagan ang Central 911.
Girespondehan dayon sa Central 911 ang insidente ug gihatagan og cardiopulmonary resuscitation (CPR) ang biktima sa wala pa kini gidala sa Southern Philippines Medical Center (SPMC) alang sa emergency medical treatment.
Apan gideklarar nga patay ang biktima sa ospital. Sa pagkakaron, anaa pa ang iyang lawas sa morgue sa SPMC samtang wala pa’y pamilya o paryente nga miangkon niini.Padayon ang imbestigasyon sa kapulisan sa maong insidente.
