DAVAO CITY – Kabsan sa kinabuhi ang usa ka trabahante nga giilang si alyas “Rocky”, 36 anyos, taga Purok Sunshine 2 Manga Barangay Visayan, Tagum City human kini maka-angkon og samad dinunggaban bandang alas 7:30 kagabii.
Subay sa imbestigasyon sa Tagum City Police Investigation and Detection Management Section, ayha nahitabo ang pagpanunggab, nag-inom pa sa usa ka sari-sari store sa may Purok Tipaz ang biktima ug ang suspek nga giilang si Alyas “Junie”, 38 anyos ug residente sa Purok Tipaz Barangay Magugpo West sa nahisgutang syudad.
Matud pa nga nagkalalis ang duha atol sa ilang panag-inom ug wala damha nga kalit na lamang gidunggab sa maong suspek ang biktima gamit ang usa ka kutsilyo nga miigo sa nagkadaiyang bahin sa lawas niini.
Gisulayan pa pagdala sa mga rescuer sa CDRRMO ang maong biktima apan nakabsan na kini sa hinulamang kinabuhi.
Samtang nagpadayon pa sab karon ang pagpangita sa kapulisan sa miikyas nga suspek nga mag-atubang og kasong Murder.
