Patay ang usa ka lalaki nga pinangita sa balaod human sumala pa nga mipakita og pagsukol sa mga otoridad atol sa gipahigayon nga manhunt operation sa Brgy. Culaman, Jose Abad Santos, Davao Occidental.
Subay sa imbestigasyon sa kapulisan, samtang magpatuman na unta sa warrant of arrest ang mga operatiba, ang suspetsado nga giila nga si Benjie Paustino Matanggo kalit sumala pa nga namusil batok sa mga operatiba nga personahe sa PNP gamit ang wala mailhing kalibre sa pusil.
Tungod niini, napugos matud pa ang mga operatiba nga mobalos nga miresulta sa pagka-neutralize sa maong suspetsado.
Nasayran nga ang suspek nga si Benjie Paustino Matanggo adunay nakaong-ong nga warrant of arrest tungod sa kasong Robbery with Homicide nga walay piyansa nga girekomenda ang korte nga gi-isyu ni Hon. Melinda Alconcel-Dayanghirang, Presiding Judge sa Regional Trial Court, 11th Judicial Region, Branch 54, sa dakbayan sa Davao niadtong Nobyembre 19, 2019.
Sumala pa sa kapulisan nga human sa maong panghitabo, gilayon nga gidala sa mga operatiba ang suspetsado sa Thomas Lachica District Hospital, Barangay Caburan Big, Jose Abad Santos, Davao Occidental apan nakabsan gihapon kini sa uyahang kinabuhi.
Narekober sa lugar sa insidente ang usa ka improvised pistol nga nailhan nga “bali-bali,” mga basyo nga bala sa .45 kalibre nga pistola, sling bag, cellphone, pouch, ug botelya nga adunay nagkalain-laing mga tambal nga mas nailhan nga “habak-habak.”
Gumilkan sa maong panghitabo, gipasalig sa pamunuan sa kapulisan ngadto sa publiko nga ang PRO 11 magpadayon sa pagkuha sa gikinahanglan ug angay nga mga aksyon, ilabi na sa mga sitwasyon nga naglakip sa kinabuhi ug kamatayon, nga ginagiyahan sa legal nga mga pamaagi ug sa labing taas nga sumbanan sa pagserbisyo.
