DAVAO CITY – Patong-patong nga kaso ang gi-andam sa otoridad batok sa usa ka 59 anyos nga lalaki human nga nasikop kini sa gipahigayon nga entrapment operation sa mga personahe sa Davao City Field Unit ug Talomo Police Station.
Naila ang dinakpan nga si Florencio Rontasd Edusma, minyo, 59 anyos, residente sa Waling-waling Brgy. Buhangin ning dakbayan.
Atol sa gilusad nga operasyon nakuha sa iyang posisyon ang usa ka unit sa .38 caliber revolver, lima ka buhing bala sa .38 caliber, Boodle Money, usa ka unit sa cellphone, usa ka sling bag, ug Driver’s License.
Tipik lamang kini human nga gipahugtan karon sa CiDG Davao City Field Unit ang ilang kampanya batok loose firearms ilabi na nga nagkaduol na karon ang election.
Nanawagan sab ang CIDG Davao ngadto sa publiko nga i-report gilayon sa ilang buhatan ang si bisan kinsa man nga violators sa balaod lakip na kadtong mga iladong pangalan ug empleyado sa kagamhanan nga nangolekta ug salapi alang sa ilang kaugalingon nga interes.
Pipila sa mga kaso nga atubangan sa dinakpan ang gilangkuban sa kalapasan sa R.A. 10591, COMELEC Resolution No. 10446, Resistance and Disobedience), Grave Threats, ug Estafa. Naghulat na lamang karon ang dinakpan sa mosunod nga kamandoan sa korte.
