DAVAO CITY – Gipasakaan na ug kasong pagsupak sa Republic act no. 11332 o ang Mandatory Reporting of Notifiable Diseases and Health Events of Public Health Concern Act ang tulo ka mga lalaki nga nadakpan gumikan sa pag-bike bisan ug mipatigbabaw na ang curfew hour sa dakbayan.
Giila ang mga dinakpan nga sila JOHN GIL M. HONRA, 21 anyos, FREDERICK NACILLA JOPIA, 23 anyos, ug CARLO DAVE HONRA VISTAL, 23 anyos, pulos mga residente sa Brgy. Maa, ning dakbayan sa Dabaw.
Gikanayon ni Police Major Sean Logronio, hepe sa Talomo Police station, samtang mipahigayon ug checkpoint ang ilang mga personahe sa Catalunan Grande Quarantine Control Point ning syudad alas 8:10 kagabii, miagi ang mga nahisgutan sakay sa ilang mountain bikes.
Sa dihang gisukit-sukit sa kapulisan nasayran nga igo lamang naglatagaw ang tulo ug dili apil sa giilang APOR o (Authorized Person Outside Residence) hinungdan nga gipugngan sila sa kapulisan.
Subay sa record, nakahimo na ang Talomo police sa pagdakop sa 67 ka mga curfew violators sukad October 15 hangtud sa kasamtangan.
Gawas sa curfew, hugot usab nga gipatuman sa Talomo police station ang uban pang mga health protocols sama sa social distancing, mass gatherings, pagsul-ob ug face shield samtang sakay sa mmga pampasaherong sakyanan ug ang pagsul-ob ug face masks.
