DAVAO CITY – Gipasaka-an na ug kasong Frustrated Homecide ang usa ka lalaki human kini makadunggab sa iyang silingan gumikan sa ilang karaan nga bangi.
Anaa na sulod sa bilanggo-an ug gipasaka-an ug kaso ang dinakpan nga naila nga usa ka Hiter Laceral, 19 anyos, usa ka vendor, ug residente sa Punta Biao, Barangay Cogon Digos City.
Pormal nga gipasaka sa kapolisan ang kaso batok sa suspek sa City Prosecutors office human midangop sa kapolisan ang ginikanan sa iyang nadunggaban, diin ang biktima nga anaa pa sa kritikal nga kahimtang mao ang usa ka Alex Padigi, hamtong ang pangidaron, usa ka vendor ug residente sa nahisgutan nga dapit.
Nasyaran nga duna na’y daan nga panaglalis ang duha ug nagkakita mga alas 8:30 ang takna sa kagabhi-on niining milabay nga gabii, diin dunay dala nga kutsilyo ang suspek ug diretso nga gidunggab ang biktima hinongdan nga nakahi-agum ug mga samad dinonggaban sa dughan nga bahin.
Misulay sa pag-ikyas ang suspek apan nadakpan sa mga sakop sa tanod, kuyog ang mga police.
