DAVAO CTY – Sikop sa mga otoridad ang usa ka lalaki nga nitigbas sa iyang ka-inom atol sa ilang paglingaw-lingaw sa Purok 6A Lower, Brgy. Magsaysay, Carmen, Davao Del Norte.
Sumala sa imbestigasyon sa Carmen Municipal Police, nakig-inom ang suspek nga si Fredie Rex Ceballos Alia, 28 years old, taga-Purok 6A-1, Brgy. Magsaysay, sa balay sa higala ug biktimang si Marlo John Alvez Arcinal, 30 anyos.
Lango sa ilimnong makahubog ang duha ka lalaki dihang nagsugod kini sa ilang panaglalis hangtud nasangko sa dugoong engkwentro diin mikuha ang suspek sa iyang sundang ug dayong gitigbas ang biktima.
Nakahiagum si Arcinal og samad sa iyang bukton dihang gidala dayon kini sa Carmen District Hospital aron magpaalim.
Samtang, wa na makaikyas sa mga sakop sa barangay police ang suspek nga si Alia.
Tanggong karon sa Carmen Municipal Police Station ang suspek samtang nahikay na ang kasong gipasaka batok kaniya.
via || Bombo LJF
