DAVAO CITY- Tingkagol sa prisohan ang usa ka lalaki human kini naaktohan nga nagapamaligya og peke nga herbal products atol sa gilusad nga buy-bust operation sa NBI XI sa Bajada ning dakbayan, kagahapon.
Giila ang dinakpan nga si alyas Andoy, hamtong ang pangidaron, ug sumala pa nagapamaligya ug nagadeliver sa iyang mga peke nga vaporin refreshing oil products.
Sumala pa sa NBI XI, nga kaniadtong Hunyo 1 naabot sa ilaha ang impormasyon kabahin sa maong pagpamaligya og peke nga produkto ug kagahapon lamang sa hapon, nadakpan ang suspetsado duol sa usa ka inn ning syudad dala ang kapin kon kulang 500 ka ihap sa rubbing oil nga nagkantitdad og P11,000.
Saysay pa sa suspek, kanhi empleyado siya sa usa ka ilado nga herbal company ug tungod sa kapait sa kinabuhi, nakadesidar kini nga magsolo ug magmugna og kaugalingong produkto.
Apan sumala pa sa International Pharmaceuticals Incorporated, dako og risgo ang mahatag niini ngadto sa mga konsyumante gumikan wala kini niagi og saktong pagtoon ug proseso.
Hinoon, nangayo na og pasaylo ang suspetsado sa mga nakapalit pinaagi sa direct selling ug gikabutyag nga nabuhat lamang niini ang pagpanlimbong aron sa paghatag sa mga nag-unang panginahanglanon sa iyang pamilya.
Ning kasamtangan, gina-andam na ang kasong kalapasan sa RA 8293 o Intellectual Property Code of the Philippines nga ipasaka batok sa suspetsado.
Samtang subli sab nagpahinumdom ang mga otoridad sa publiko nga mopalit lamang sa mga botika aron dili mabutang sa risgo ang ilang kinabuhi.
