DAVAO CITY – Patay ang usa ka lalaki sa Purok Tipaz Barangay Magugpo West, Tagum City, Davao del Norte sa dihang gidunggab kini sa iyang kainom niadtong Dominggo sa gabii.
Ang biktima ang giila sa kapulisan isip alyas “Rocky”, 36 anyos, taga-Purok Sunshine 2 Manga Barangay Visayan, Tagum City.
Sumala sa Tagum City Police Investigation and Detection Management Section, nakig-inom pa ang biktima sa suspek nga si alyas “Junie”, 38 anyos, residente sa lugar diin nahitabo ang krimen.
Matud pa, nagkalalis ang duha atol sa ilang panag-inom ug ilimnong makahubog ug wa damha nga gidunggab sa maong suspect and biktima gamit ang usa ka kutsilyo nga miigo sa lain-laing parte sa lawas niini.
Gisulayan pa sa mga rescuer sa CDRRMO nga maluwas apan gideklara na kining patay na.
Kasamtangang ginapangita na sa Tagum City Police si alyas “Junie” nga gikatakdang mag-atubang ug kasong murder.
VIA | Bombo LJ Florendo
