Usa ka lalaki ang gipusil-patay samtang nagsakay sa jeep sa may Boulevard bandang alas 11:05 lamang ganihang buntag.
Subay sa impormasyon gikan sa Sta. Ana PNP, giila ang maong biktima nga si Paul John Dizon Ferraren, anaa sa 28 hangtud 29 anyos ang pangidaron, construction worker ug residente sa Manggahan Ecoland, Brgy 76-A. Sa pakighinabi sa Bombo Radyo Davao kang Julieto Ursabia, driver sa jeep nga gisakyan sa biktima, misakay matud pa kini sa may Magsaysay apan pag-abot niini sa may Boulevard, kalit na lamang mibutho ang suspek nga sakay sa usa ka motorsiklo nga kolor itom ug gipusil ang biktima sulod sa tulo ka higayon.
Matud pa sa mga otoridad, bag-ohay lamang nakulong ang maong biktima gumikan sa kasong pagpangawat apan nakagawas kini ganihang buntag lamang. Dali-dali gidala ang biktima ngadto sa Southern Philippine Medical Center (SPMC) pero ‘dead on arrival’ na kini.
Sumala pa sa imbestigasyon ng Davao City Forensic Unit-SOCO, caliber 9mm nga pusil ang gigamit sa pagpusil human makita sa crime scene ang kasko sa cartridge ug kasamatangan naa na sa kustodiya sa maong ahensya.
Sa pagkakaron, wala pa matino ang motibo. Busa, nihimo og manhunt dragnet operation ang Sta. Ana Police Station ngadto sa posibleng pag-ila sa mga suspek.
Via || JEN MANGUIOB, DAVID FRANCISQUETE
