DAVAO CITY – Gipaklaro sa Davao City Police Office ang alegasyong robbery incident nga nahitabo sa may Mudiang, Davao City, niadtong Mayo 29, bandang alas 10:00 sa buntag diin nalambigit ang usa ka 25 anyos nga biktima nga giilang si alyas Jerry nga usa ka negosyante.
Nasayran nga unang mitaho ang biktima nga samtang nagmaneho sa iyang multicab, gibabagan sa upat ka lalaki ang iyang sakyanan ug nideklarar og nahold-up, ug nalimas ang Php 320,000.00.
Naglusad og imbestigasyon ang Bunawan Police Station sa giingong insidente. Atol sa imbestigasyon, nasayran nga nagmugna lamang og istorya ang maong negosyante og bugasan ug diha na sab nabulgar atol sa iyang pagpakita sa presinto kagahapon, Mayo 31, uban sa uban sa iyang pamilya nga duna kini wa gibayaran nga utang.
Gibarugan sa Bunawan Police nga dili palapason ang mga susamang taho nga naghatag og kalisang ug kabalaka sa publiko.
